ಕೇಂದ್ರ ಸರ್ಕಾರದ ತೆಂಗು ಅಭಿವೃದ್ಧಿ ಮಂಡಳಿಯಿಂದ ನೇರವಾಗಿ ತೆಂಗು ಅಭಿವೃದ್ಧಿ ಸಂಘಗಳಿಗೆ ಹನ್ನೆರಡು ವರ್ಷಗಳ ಈಚೆಗೆ ಚನ್ನಪಟ್ಟಣ ತಾಲ್ಲೂಕಿನಲ್ಲಿ ದಶ ಕೋಟಿ ಗೂ ಹೆಚ್ಚು ಹಣ ಗುಳುಂ ಆಗಿದ್ದು ರಾಜ್ಯ ಮತ್ತು ಕೇಂದ್ರ ಸರ್ಕಾರದಿಂದ ಉನ್ನತ ಮಟ್ಟದ ತನಿಖೆಗೆ ಆದೇಶಿಸಬೇಕೆಂದು ಸಮಾಜ ಸೇವಕ ಮೊಗಳ್ಳಿದೊಡ್ಡಿ ರೋಹಿತ್ ಒತ್ತಾಯಿಸಿದರು.

ಅವರು ನಗರದ ಪ್ರವಾಸಿ ಮಂದಿರದಲ್ಲಿ ಕರೆದಿದ್ದ ಪತ್ರಿಕಾ ಗೋಷ್ಠಿಯಲ್ಲಿ ಮಾತನಾಡಿದರು.

ತಾಲ್ಲೂಕಿನಲ್ಲಿ ಏಳು ತೆಂಗು ಅಭಿವೃದ್ಧಿ ಸಂಘಗಳಿದ್ದು ಆರು ಸಂಘಗಳು ಸಕ್ರಿಯವಾಗಿವೆ, ಒಂದು ಸಂಘ ನಾಮಕಾವಸ್ಥೆಯದಾಗಿದ್ದು ಹಣ ಸಂದಾಯವಾಗಿದೆ, ಕೇವಲ ನಾಲ್ಕು ವರ್ಷಗಳಲ್ಲಿ ಅಂದರೆ ೨೦೧೪ ರಿಂದ ೨೦೧೮ ರ ಅವಧಿಯಲ್ಲಿ ಚನ್ನಪಟ್ಟಣ ತಾಲ್ಲೂಕಿನ ಏಳು ಸಂಘಗಳಿಗೆ *೪,೦೮,೫೨,೯೨೪₹* ಗಳು ಸಂದಾಯವಾಗಿದೆ, ಇಲ್ಲಿ ಸಂಘದ ಬಲಾಢ್ಯರು ಮಾತ್ರ ತಮ್ಮ ವೈಯುಕ್ತಿಕ ಅಭಿವೃದ್ಧಿ ಹೊಂದಿದ್ದಾರೆ ವಿನಹ ಎರಡು ನೂರಕ್ಕೂ ಹೆಚ್ಚು ಸದಸ್ಯರಿಗೆ ಅದರ ಅರಿವೇ ಇಲ್ಲ ಎಂದರು.

ಪ್ರತಿ ಸಂಘಗಳಿಗೂ ಟ್ರ್ಯಾಕ್ಟರ್, ಟಿಲ್ಲರ್, ಟ್ರೈಲರ್, ಟ್ಯಾಂಕರ್ ಗಳಲ್ಲದೇ ತೆಂಗುಬೆಳೆ ಬೆಳೆದಿರುವ ಜಮೀನುಗಳಲ್ಲಿ ಬೆಳೆಯುವಂತಹ ಬಾಳೆ ಸಸಿಗಳು, ಮುಸುಕಿನ ಜೋಳ, ಹುರುಳಿಬೀಜ ದಂತಹ ಅನೇಕ ಬೀಜಗಳನ್ನು ಸಹ ಟನ್ ಗಟ್ಟಲೆ ಕೊಟ್ಟಿರುವುದು, ಅವುಗಳಿಗೆ ರಾಸಾಯನಿಕ ಮತ್ತು ರಸಗೊಬ್ಬರಗಳನ್ನು ಸಹ ಕೊಟ್ಟಿರುವುದು ದಾಖಲೆಗಳಿಂದ ತಿಳಿಯುತ್ತದೆ, ಈ ಎಲ್ಲಾ ಸರಕು ಸರಂಜಾಮುಗಳನ್ನು ಇಲಾಖೆ ವಿತರಿಸಿದ್ದು ಬಲಾಢ್ಯರು ಮಾತ್ರ ಉಪಯೋಗಿಸಿಕೊಳ್ಳುತ್ತಿರುವುದು ತಿಳಿದುಬಂದಿದೆ ಎಂದು ಆರೋಪಿಸಿದರು.

ಮುಂದುವರಿದು ಮಾತನಾಡಿದ ಅವರು ಕ್ಷೇತ್ರಕ್ಕೆ ಆಗಮಿಸುತ್ತಿರುವ ಮುಖ್ಯಮಂತ್ರಿಗಳಿಗೆ ಮತ್ತು ಸಂಬಂಧಿಸಿದ ಇಲಾಖೆಯ ಉನ್ನತ ಅಧಿಕಾರಿಗಳಿಗೆ ದಾಖಲೆ ಸಮೇತ ದೂರು ನೀಡುವುದಾಗಿ ತಿಳಿಸಿದರು.

ಇದೇ ವೇಳೆ ಮಾತನಾಡಿದ ಹಿರಿಯ ರೈತ ಮುಖಂಡ ಸಿ ಪುಟ್ಟಸ್ವಾಮಿ ಚನ್ನಪಟ್ಟಣ ತಾಲೂಕು ಒಂದರಲ್ಲೇ ಕೇವಲ ನಾಲ್ಕು ವರ್ಷಗಳಲ್ಲಿ ನಾಲ್ಕು ಕೋಟಿಗೂ ಹೆಚ್ಚು ಹಣ ದುರುಪಯೋಗ ಆಗಿದೆ ಎಂದರೆ ೨೦೦೭ ರಿಂದ ೨೦೧೯ ರ ವರೆಗೆ ಎಷ್ಟು ದುರುಪಯೋಗ ಆಗಿದೆ, ರಾಮನಗರ ಜಿಲ್ಲೆ ಸೇರಿದಂತೆ ರಾಜ್ಯಾದ್ಯಂತ ಶತಕೋಟಿಗೂ ಹೆಚ್ಚು ಹಣ ದುರುಪಯೋಗ ಆಗಿರಬಹುದು ಎಂದು ಮೇಲ್ನೋಟಕ್ಕೆ ತಿಳಿಯುತ್ತದೆ, ಇದನ್ನು ಉನ್ನತ ಮಟ್ಟದ ತನಿಖೆ ಮಾಡಿಸಿ ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮ ಕೈಗೊಂಡು ನೈಜ ಫಲಾನುಭವಿಗಳಿಗೆ ಅವಕಾಶ ಮಾಡಿಕೊಡಬೇಕೆಂದು ಒತ್ತಾಯಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ  ಸಂಘದ ಸದಸ್ಯರಾದ ಮೋಹನ್, ರಾಮಕೃಷ್ಣ, ಚನ್ನೇಗೌಡ ಮತ್ತು ಬಸವರಾಜು ಹಾಜರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.